Birendranagar Municipality

नेकपा प्रमुख सचेतकबाट देव गुरुङ हटाईए, विशाल भट्टराई बने सचेतक

सेरोफेरो
नेकपा प्रमुख सचेतकबाट देव गुरुङ हटाईए, विशाल भट्टराई बने सचेतक

१४ फागुन । प्रधानमन्त्री तथा विभाजित नेकपाको संसदीय दलका नेता केपी शर्मा ओलीले दलको प्रमुख सचेतकमा विशाल भट्टराईलाई नियुक्त गरेका छन्। प्रतिनिधिसभा पुनःस्थापनापछि देव गुरुङलाई प्रमुख सचेतकबाट बर्खास्त गरि खोटाङबाट निर्वाचत भट्टराईलाई प्रमुख सचेतक मनोनयन गरिएको हो ।

 

भट्टराईलाई प्रधानमन्त्री ओलीले आजै संसदीय दलका उपनेता सुवास नेम्वाङसहितको उपस्थितिमा प्रमुख सचेतकको नियुक्तिपत्र दिएका हुन् । खोटाङबाट दुईपटक निर्वाचित सांसद भट्टराई नेकपा केन्द्रीय सदस्य हुन्। अनेरास्ववियुको राजनीतिबाट आएका भट्टराई २०५१ सालमा महेन्द्ररत्न क्याम्पस ताहाचलको स्ववियु सभापति जिम्बेवारी सम्हालेका थिए ।

 

विधान अनुसार दलको नेताले उपनेता, प्रमुख सचेतक र सचेतक मनोयन गर्ने व्यवस्था नेकपामा छ ।

 

पार्टी विभाजनले कानुनी मान्यता नपाइसकेको अवस्थामा विधिवत रुपमा नेकपाको संसदीय दल एउटै छ । सो दलबाट प्रमुख सचेतक गुरुङ र सचेतक शान्ता चौधरी थिए । चौधरी सचेतकमा यथावत रहेको उपनेता नेम्वाङले बताए ।

 

प्रतिनिधिसभा विघटनपछि प्रचण्ड–माधव पक्षले दलको अलग्गै बैठक बसेर पुष्पकमल दाहाललाई दलको नेता चयन गरेका थियो । अहिले प्रतिनिधिसभा पुनःस्थापनापछि दलको नेताबाट ओलीलाई हटाउने प्रक्रियामा जाने कि सिधै संसदमा अविश्वास प्रस्ताव दर्ता गर्ने भन्ने टुंगो लागिसकेको छैन ।

 

ओली पक्षले पार्टी विभाजनले कानुनी मान्यता नपाउँदासम्म दलको नेता ओली रहेको हुनाले प्रचण्ड(माधव पक्षले दलको नेता परिवर्तन गर्ने हो भने बहुमत सांसद जुटाएर दलभित्रको प्रक्रियामा आउनुपर्ने बताइरहेको छ ।

 

तर प्रचण्ड–माधव पक्षका सांसद कृष्णभक्त पोखरेलले भने आफूहरुले त्यसबारे अहिले नसोचेको भन्दे संसदकै प्रक्रियामा जाने सम्भावना रहेको बताए । नेकपाका संघीय संसदका २२३ सांसदमध्ये दुवै पक्षमा हाराहारी सांसद रहेका छन् ।

 

केही सांसदको ओहोरदोहोर चलिरहेको बेला ओलीलाई बुहमतबाट हटाउने संख्या नपुग्ने आशंका प्रचण्ड(माधव पक्षमा छ । त्यसैले दलको वैधानिक प्रक्रियामा जाने भन्दा अब पार्टी विभाजनलाई कानुनी प्रक्रियाबाट मान्यता दिलाउनेतर्फ सो पक्ष लाग्ने भएको छ ।
नेपालप्रेसबाट

 

२०७७ फागुन १४ मा प्रकाशित

प्रतिकृया दिनुहोस्